ਜ਼ਮੀਰਾਂ ਜਗਾਓ, ਜ਼ਬਾਨ ਖੋਲ੍ਹੋ, ਤੇ ਸੱਚ ਬੋਲੋ
ਦਲ ਖਾਲਸਾ ਅਲਾਇੰਸ ਸਿਰਦਾਰ ਗਜਿੰਦਰ ਸਿੰਘ ਦੇ ਵਿਚਾਰਾਂ ਦੀ ਪ੍ਰੋੜਤਾ ਕਰਦਾ ਹੈ।
ਜਿੰਦਰ ਸਿੰਘ, ਦਲ ਖਾਲਸਾ ।
ਪਿੱਛਲੇ ਕੁੱਝ ਦਿਨਾਂ੍ਹ ਵਿੱਚ ਇੱਕ ਤੋਂ ਬਾਦ ਦੂਜੇ, ਤੇ ਦੂਜੇ ਤੋਂ ਬਾਦ ਤੀਜੇ ਪੁਲਸ ਮੁਲਾਜ਼ਮ ਦੀ ਜ਼ਮੀਰ ਜਾਗੀ ਹੈ, ਤੇ ਉਹ ਸਿੱਖ ਨੌਜਵਾਨਾਂ ਨੂੰ ਝੂਠੇ ਪੁਲਸ ਮੁਕਾਬਲਿਆਂ ਵਿੱਚ ਕਤਲ ਕੀਤੇ ਜਾਣ ਸਬੰਧੀ ਚਿਰਾਂ ਤੋਂ ਬੰਦ ਪਈ ਆਪਣੀ ਜ਼ੁਬਾਨ ਖੋਲ੍ਹ ਰਹੇ ਨੇ । ਇਹਨਾਂ ਦੇ ਅੱਜ ਸੱਚ ਬੋਲਣ ਦੇ ਪਿੱਛੇ ਇਹਨਾਂ ਦਾ ਜ਼ਾਤੀ ਕਾਰਨ ਕੁੱਝ ਵੀ ਹੋਵੇ, ਪਰ ਸਾਡੇ ਪੱਖੋਂ ਇਹ ਸਵਾਗਤਯੋਗ ਹੋਣਾ ਚਾਹੀਦਾ ਹੈ । ਇਹ ਲੋਕ ਭਾਵੇਂ ਖੁੱਦ ਗੁਨਾਹ ਵਿੱਚ ਸ਼ਾਮਿਲ ਰਹੇ ਹਨ, ਤੇ ਭਾਵੇਂ ਗੁਨਾਹ ਦੇ ਚਸ਼ਮਦੀਦ ਰਹੇ ਹਨ, ਇਹਨਾਂ ਦਾ ਅੱਜ ਸੱਚ ਬੋਲਣਾ ਸਾਡੇ ਲਈ ਅਹਿਮ ਗੱਲ ਹੈ ।
ਇਹੋ ਜਿਹੇ ਹੋਰ ਵੀ ਬਹੁਤ ਸਾਰੇ ਪੁਲਸ ਮੁਲਾਜ਼ਿਮ ਹੋਣਗੇ, ਜਿਹਨਾਂ ਦੀਆਂ ਆਤਮਾਵਾਂ ਅੱਜ ਗੁਨਾਹ ਦਾ ਭਾਰ ਮਹਿਸੂਸ ਕਰ ਰਹੀਆਂ ਹੋਣਗੀਆਂ । ਇਹਨਾਂ ਸੱਭ ਨੂੰ ਯਾਦ ਰੱਖਣਾ ਚਾਹੀਦਾ ਹੈ, ਕਿ ਇਹ ਲੋਕ ਪੰਜਾਬ ਦੀ ਮਿੱਟੀ, ਜਿਹੜੀ ਬੇਬਹਾ ਸ਼ਹੀਦਾਂ ਦੇ ਖੁਨ ਨਾਲ ਸਿੰਝੀ ਪਈ ਹੈ, ਦੇ ਗੁਨਾਹਗਾਰ ਹਨ, ਤੇ ਕਰਜ਼ਦਾਰ ਹਨ । ਇਸ ਮਿੱਟੀ ਨੇ, ਪੰਥ ਤੇ ਪੰਜਾਬ ਦੇ ਗੁਨਾਹਗਾਰਾਂ, ਗੱਦਾਰਾਂ ਨੂੰ ਪੀੜੀਆਂ ਤੱਕ ਕਦੇ ਮੁਆਫ ਨਹੀਂ ਕੀਤਾ । ਅਜਿਹੇ ਮੁਲਾਜ਼ਮਾਂ ਦੇ ਪਿਓ ਦਾਦੇ ਇਸੇ ਮਿੱਟੀ, ਤੇ ਇਸ ਦੇ ਪਾਣੀਆਂ ਵਿੱਚ ਸਮਾਏ ਹੋਏ ਹਨ ਤੇ ਇਹਨਾਂ ਦੀਆਂ ਆਣ ਵਾਲੀਆਂ ਨਸਲਾਂ ਨੇ ਵੀ ਇੱਥੇ ਹੀ ਆਖਰੀ ਪੱਨਾਹ ਮੰਗਣੀ ਹੈ । ਤੁਸੀਂ ਆਪਣੀ ਜ਼ਬਾਨ ਤੋਂ ਬੋਲੋ ਜਾਂ ਨਾਂਹ ਬੋਲੋ, ਪਰ ਇਹ ਸੱਚ ਹੈ ਕਿ ਗੁਨਾਹ ਕਦੇ ਸਦਾ ਲਈ ਲੁਕੇ ਨਹੀਂ ਰਹਿੰਦੇ । ਬਹੁਤ ਸਾਰਾ ਸੱਚ ਪਹਿਲਾਂ ਬਾਹਰ ਆ ਚੁੱਕਾ ਹੈ, ਤੇ ਬਹੁਤ ਸਾਰਾ ਆਣਾ ਹਾਲੇ ਬਾਕੀ ਹੈ । ਸਿੱਖ ਕੌਮ ਦੇ ਆਜ਼ਾਦੀ ਪਸੰਦ ਸੂਰਬੀਰਾਂ ਤੇ ਉਹਨਾਂ ਦੇ ਪਰਿਵਾਰਾਂ ਦੇ ਜੀਆਂ ਨੂੰ ਝੂਠੇ ਪੁਲਸ ਮੁਕਾਬਲੇ ਬਣਾ ਕੇ ਦਰਿਆਵਾਂ 'ਚ ਰੋਹੜਿਆ ਗਿਆ, ਜਾਂ ਲਾਵਾਰਿਸ ਕਹਿ ਕੇ ਫੂਕ ਦਿੱਤਾ ਗਿਆ, ਇਹਨਾਂ ਨਾਲ ਸਾਡੇ ਹਿਰਦੇ ਦੁਖੀ ਜ਼ਰੂਰ ਹੋਏ ਨੇ, ਸਿਰ ਨੀਵੇਂ ਨਹੀਂ ਹੋਏ, ਪਰ ਤੁਹਾਡੇ ਕਲੰਕਿਤ ਹੋਏ ਚਿਹਰੇ ਨਾ ਕਿਸੇ ਗੰਗਾ ਜਮਨਾ ਨੇ ਧੋਣੇ ਨੇ, ਤੇ ਨਾਂ ਸਦੀਆਂ ਦੇ ਫਾਸਲੇ ਨੇ ਸਾਫ ਕਰਨੇ ਨੇ । ਇਹਨਾਂ ਗੁਨਾਹਾਂ ਦੀ ਕਾਲਖ ਤੋਂ ਆਪਣੇ ਆਪ, ਤੇ ਆਪਣੀਆਂ ਆਣ ਵਾਲੀਆਂ ਨਸਲਾਂ ਨੂੰ ਬਚਾਉਣ ਦਾ ਤੁਹਾਡੇ ਕੋਲ ਸਿਰਫ ਤੇ ਸਿਰਫ ਇੱਕ ਹੀ ਰਸਤਾ ਹੈ, ਤੇ ਉਹ ਹੈ ਸੱਚ ਬੋਲਣਾ ਤੇ ਦਿੱਲੀ ਦੇ ਹਾਕਮਾਂ ਤੇ ਉਹਨਾਂ ਦੇ ਕਾਰਿੰਦਿਆਂ ਦੇ ਗੁਨਾਹਾਂ ਨੂੰ ਦੁਨੀਆਂ ਸਾਹਮਣੇ ਨੰਗਾ ਕਰਨਾ, ਬੇਨਕਾਬ ਕਰਨਾ । ਪੰਥ ਦਾ ਹਿਰਦਾ ਬਹੁਤ ਵਿਸ਼ਾਲ ਹੈ, ਤੇ ਪੰਜਾਬ ਦੀ ਮਿੱਟੀ ਵੀ ਬੜੀ੍ਹ ਖੁੱਲ੍ਹ ਦਿਲੀ ਹੈ, ਰਹਿਮ ਆ ਗਿਆ ਤਾਂ ਤੁਹਾਨੂੰ ਤੇ ਤੁਹਾਡੀਆਂ ਆਣ ਵਾਲੀਆਂ ਨਸਲਾਂ ਨੂੰ ਬਖਸ਼ ਦੇਵੇਗੀ । ਰਸਤਾ ਤੁਹਾਨੂੰ ਦਿਖਾ ਦਿੱਤਾ ਹੈ, ਪਰ ਚੁਣਨਾ ਤੁਹਾਡੇ ਹੱਥ ਹੈ । ਆਪਣੇ ਧੀਆਂ ਪੁੱਤਾਂ ਨੂੰ, ਤੇ ਆਪਣੀਆਂ ਆਣ ਵਾਲੀਆਂ ਨਸਲਾਂ ਨੂੰ ਅਗਰ ਇਸ ਮਿੱਟੀ ਦੀ ਨਫਰਤ ਤੋਂ ਬਚਾਉਣਾ ਚਾਹੁੰਦੇ ਹੋ ਤਾਂ ਬੋਲੋ, ਸੱਚ ਬੋਲੋ, ਤੇ ਇਸ ਕੌਮ ਤੇ ਹੋਏ ਜ਼ੁਲਮਾਂ ਦੇ ਭੇਤ ਖੋਲੋ । ਚੰਦੂ, ਗੰਗੂ, ਜਾਂ ਤੇਜਾ ਸਿੰਘ, ਲਾਲ ਸਿੰਘ, ਡੋਗਰਿਆਂ, ਮੁਖਬਰਾਂ, ਤੇ ਕੌਮ ਘਾਤਕਾਂ ਵਰਗੇ ਕਲੰਕਾਂ ਤੋਂ ਬੱਚਣ ਦਾ ਇਹ ਮੌਕਾ ਹੱਥੋਂ ਗਵਾਓ ਨਾ । ਜ਼ਿੰਦਗੀ ਦਾ ਕੋਈ ਨਹੀਂ ਪਤਾ ਹੁੰਦਾ, ਅੱਜ ਹੈ, ਜਾਂ ਕੱਲ ਹੈ, ਪਰ ਆਤਮਾਵਾਂ ਤੇ ਛੱਡੇ ਭਾਰ ਮਰਨ ਬਾਦ ਵੀ ਨਹੀਂ ਜੇ ਲਹਿਣੇ । ਆਪਣੀਆਂ ਆਤਮਾਵਾਂ ਨੂੰ ਜਗਾਓ, ਸੱਚ ਬੋਲਣ ਦੀ ਹਿੰਮਤ ਕਰੋ ਤੇ ਪੰਜਾਬ ਦੀ ਮਿੱਟੀ ਦਾ ਕਰਜ਼ਾ ਉਤਾਰ ਜਾਓ ।
ਇਹ ਜੰਗ, ਜੋ ਲੜੀ ਗਈ, ਤੇ ਲੜੀ ਜਾ ਰਹੀ ਹੈ, "ਹਿੰਦ ਤੇ ਪੰਜਾਬ" ਦੀ ਜੰਗ ਸੀ, ਤੇ ਹੈ । ਤੁਸੀਂ ਓਦੋਂ ਪੰਜਾਬ ਦੇ ਖਿਲਾਫ ਹਿੰਦ ਨਾਲ, ਇਕ ਦੁਸ਼ਮਣ ਨਾਲ ਖੜ੍ਹੇ ਹੋਏ ਸੀ, ਤੇ ਉਸ ਦੇ ਗੁਨਾਹਾਂ ਦੇ ਭਾਗੀਦਾਰ ਬਣੇ ਸੀ । ਇਹ ਜੰਗ ਭਾਵੇਂ ਸਦੀਆਂ ਲੰਮੀ ਚੱਲੇ, ਤੇ ਭਾਵੇਂ ਕਿੰਨੇ ਵੀ ਰੂਪ ਵਟਾਵੇ, ਪਰ ਖਤਮ ਪੰਜਾਬ ਦੀ ਜਿੱਤ ਨਾਲ ਹੀ ਹੋਣੀ ਹੈ । ਤੁਹਾਡੇ ਕੋਲ ਅੱਜ ਮੌਕਾ ਹੈ, ਆਪਣੀ ਮਿੱਟੀ, ਤੇ ਆਪਣੀ ਕੌਮ ਨਾਲ ਵਫਾਦਾਰੀ ਦਿਖਾਣ ਦਾ । ਆਪਣੀ ਗਲਤੀ ਨੂੰ ਸੁਧਾਰੋ, ਤੇ ਆਪਣੀਆਂ ਆਣ ਵਾਲੀਆਂ ਨਸਲਾਂ ਨੂੰ ਕਲੰਕਿਤ ਹੋਣ ਤੋਂ ਬਚਾ ਲਓ । ਬਚਪਨ ਤੋਂ ਸੁਣਦਾ ਆਇਆ ਹਾਂ ਕਿ ਦਸਮੇਸ਼ ਪਿਤਾ ਦੇ ਪੰਥ ਨਾਲ ਗੱਦਾਰੀ ਕਰਨ ਵਾਲੇ ਦਾ ਮੂੰਹ ਦੋਹੀਂ ਜਹਾਨੀ ਕਾਲਾ ਹੋਇਆ ਹੈ । ਫੈਸਲਾ ਤੁਹਾਡੇ ਹੱਥ ਹੈ ।
ਗਜਿੰਦਰ ਸਿੰਘ, ਦਲ ਖਾਲਸਾ ।
*****
ਦਲ ਖਾਲਸਾ ਅਲਾਇੰਸ ਸਿਰਦਾਰ ਗਜਿੰਦਰ ਸਿੰਘ ਦੇ ਵਿਚਾਰਾਂ ਦੀ ਪ੍ਰੋੜਤਾ ਕਰਦਾ ਹੈ।
No comments:
Post a Comment